(كرات عكسية)
محمد كامل سعيد
انتفض الإيطالي جيوفاني (العاطل) وأعلن بداية حرب مفاجئة ضد مجلس (الكومبارس المريخي فاقد الشرعية).. وَلعل القصة ممكن نقول عليها (ياااا دوبك ابدت)..!!
# الإيطالي (العاطل) قال لمجلس (الكومبارس المريخي الفاشل): لا معليش هنالك بعض المحترفين (ماليزمونيش).. و(نيش) دي ما بيقصد بيها الخواجة لا شعر (كوكو) ولا (الجزولي نوح)..!!
# مجلس الكومبارس بقيادة (نينو) فاقد الشرعية يدخلوا ويمرقوا (زي ام العروسة) وما عارفين يفاتحوا الزول ده في الموضوع.. يفاتحوه كيف وهو إيطالي وبياكل مكرونة وبيتزا..؟!
# يا مازدا حاول اتكلم معاه.. لا لا لا انا في الأول قلت ليكم الزول ده (عاطل) وح يجي ينشف ريقنا ويورينا النجَوم في عز الضهر.. يا ابراهومة ما تفول حاجة.. هوي انا لا بعرف انكلم إيطالي ولا بقدر اوصل ليهو كلامي..!!
# طيب يا (نينو) انت الجبت لينا (الكفوة دي).. حاول اتصرف معاهو واقنعوا يعدل من قراروا عشان نحنا يادوب جبنا الأجانب ديل.. وما عارفين نوريهم سبب أبعادهم من التمارين الجماعية شنو..؟!!
# (نينو) يقول لمازدا خلاص ارح معاي عشان انت بتتكلم لغات.. وانا ح اقول ليك الكلام وانت توصلوا للخواجة.. العملية دي ح تكوت بي معرفتك.. لكن إذا أنا عليت صوتي ورفعتو انت لازم تخفف ترجمتك ليهو.. لانو الايطاليين ديل صعبين خلاص..!!
# ويظهر سؤال مهم جدا في تلك الاثناء وهو: وين الزول بتاع (العدس) ده.. هسه لو كان موجود كان جربناهو معانا عشان ينقلنا.. ويعمل لينا شوية (قدحة) ويساعدنا في الكلام اللي ح تقولو للعاطل ده..!!
# عاينو يا جماعة.. (العاطل) ده اعملو حسابكم منو.. انا زاتي ما متذكر الأجانب الابعدهم ديل منو.. َولا جنسياتهم.. طيب انا عندي مقترح ممكن نقول ليهو انحنا زاتنا عايزين نقلص عدد المساعدين الجبتهَم معاك ديل.. لأنهم كتاار وما عندنا طريقة نوفر ليهم مرتبات في كل شهر..!!
# الله أكبر الله أكبر.. ده الكلام النجيض.. نضغطوا عشان نرهبوا.. ويقوم ينصاع لاوأمرنا ويرجع المحترفين اللي قال ما عايزهم.. يسلم لسانك يا – نينو) ده انت طلعت اداري شاطر وجامد ونحن ما عارفين..!!
# خلاص جيبو لينا الزول ده عشان ننتهي منو ونضع النقاط فوق الحروف وننتهي من الهوجة دي.. والفريق يركز في الاستعداد للنصر الليبي اللي ما عارفين طلع لينا بالذات في للوقت ده كيف ومن َوين وليييه..؟!!
# تحرك الجميع وكل واحد من أعضاء (مجلس الكومبارس) يردد في داخله يا حليلك با (صحافي القونات) هسه لو كنت معانا كنت (كشحت لينا الحلة) في وش الإيطالي (العكليتة) ده واعلنا الانسحاب من الوهمية دي.. بالجد في الليلة الظلماء يفتقد الككر..!!
# الاجتماع او ما يسمى بجلسة المواجهة بدا بعبارات استسلامية بها القليل من التطبيل الاعوج والاشتر.. طبعا يا خواجة نحنا جبناك وختينا فيك الأمل عشان تفتح للفريق سكة العبور من الدور التمهيدي لدوري أبطال أفريقيا لان الفريق طوالي بيسقط في هذه المحطة وقليلا ما بعبرها..!!
# َالخواجة (العاطل) يفاجئ الحضور بالنطق بعبارة باللغة العربية المكسرة: (يعني انت آيز تقول انو انا مكنة)..؟! فيبدئ الجميع اندهاشهم من الجملة الغريبة دي واللي اتقالت باللهجة السودانية كمان..!!
# ويواصل (العاطل) جيوفاني الحديث ويقول: (انت لو آررف اني مكنة يبقى لازم تسيبني احدد مين اللي ح يلعب… ومين اللي مش ها يلأب.. واللي انا أقول ما ح يلعب.. يبقى مش لازم يلعب ابدا.. والا تشوفوا ليكم كوتش تانية.. اااي قال تانية كده باللفظ..!!
# بعدين دول مش محترفين.. دول انت جبتهم بالفيديو.. والفيديو ده فيهو برنامج بتاع غش كتيير.. وممكن يجيب ليك واحد ما بيعرف يشوت كورة.. يصوروا ليك وكانو ميسي او كريستيانو.. يو نو ميسي وكريستيانو..؟!
# الكلام بتاعي انا لازم يمشي لاني مدير فني.. ولو مش عايز تعمل كلامي اديني هسه دولادَرات بتاع الشرط الجزائي.. والا انا كمان بمشي فيفا.. وانت آرف لو انا مشيت فيفا ها يحسل شنو..؟!
# الله يجازي محنك يا خواجة.. اللي ح يحصل شنو كان مشيت الفيفا..؟! ما نحنا عندنا معتصم جعفر واسامة عطا المنان ممكن يلحقونا وينهوا لينا اي قصة او شكوى تترفع ضدنا امام الفيفا في ثواني..!!
# يجيب الخواجة الإيطالي قائلا: (مين قلت..؟! آتا المنان وجافر.. هههه يا حبيب انا لو وصلت فيفا اتا المنان وجافر ديل ما ح ينفاوك لانه ح يكون في وضع النيران وانا ح استلم الشرت الجزائي بتاعي فورا..!!
# َالله لا كسبك يا خواجة جايبين لينا إيطالي بيتكلم (رندوك) وبيقول (مكنة) ده إيطالي من ام بدة والا صابرين.. اها شنو الحل يا (عاطل) اللي انت عايزو نحنا بعمل ليك بدون اي نقاش..!!
# شوف (يا آمك) انا كمسة من محترفين ديل ما بنفأو معاي.. واللي شايفوا احسن تنهوا تأقد معاهم وتخليهم يمشوا يشوفو ياكلو ايش في مكان تاني غير مريم ده.. وانا اندي أجانب ح اجيبهم ليكم بمعرفتي انا…!!
# بالنسبة للمساعدين بتاعيني انا ما عندي اي مانع اقلص عددهم لكن عشان ما امشي فيفا لازم تدفعوا ليهم شرط جزائي بتاعهم عشان يمشوا وهم ما زعلانين ويكون مبسوطين خالص خالص..!!
# بعدين انا مش عايز زول اسمو آمي كمال ده.. لانو زول كبير وما عارف هو قاعد في الكشف الي الان ليييه.. وانا شركتوا عشان أأكد ليكم انو ثغرة واضحة ويعتبر كبري يسهل وصول المهاجمين الي مرمى مريك..!!
# يا جماعة انا شايف الاجتماع ده انتهى.. لو وافقوا على استمراري فبها ولازم تنفذوا لي مطالبي واذا ما وافقتوا يبقى لازم تجهزوا دولارات قبل ما اقرر الذهاب لفيفا.. وانتو عارفين فيفا يعني شنو.. سلام يا مالمين..!!
# فجأة صحيت من النوم ولقيت روحي بتكلم براي جيوفاني (العاطل) الله لا كسبك َولا كسب يومك.. انت جاي تستفزنا وتاكل قروشنا وَالا شنو..؟! فوجدت نفسي لوحدي في الغرفة فاستعذت بالله من الشيطان الرجيم..!!
# *تخريمة اولي:* صعد المريخ الي نصف نهائي دورة نيجيريا (المجهولة).. فسالت مشاعر الناس (جداول) فرحا.. وكان هذه البطولة هي دوري أبطال أفريقيا.. (انا شايف الناس دي يفترض تهدأ شوية لان كل بداية خاطئة تكون نهايتها قريبة كما حدث للأحمر امام ريمو ستار)..!!
# *تخريمة ثانية:* اثبتت الايام ان الإيطالي (العاطل) طلع فوق رأس مجلس (الكومبارس) وكمان (دلدل كرعينو).. وعايز يجيب ليهو محترفين بناء على رأي السماسرة والوكلاء.. دي المناظر يا جماعة.. انتو ما شفتو حاجة لسسسسه..!!
# *تخريمة ثالثة:* المدرب (العاطل) الإيطالي كتب النهاية لنصف صفقات (مشجع الهلال).. وأعلن ايعادهم من حساباته بشكل نهائي.. اها مش ده تطبيق عملي للمثل البقول: (التسوبهو بايدك.. يغلب اجاويدك)..!!
# *حاجة اخيرة:* الإدارة علم وفهم وهيبة وتدبير وتفكير قبل الشروع في تنفيذ أي خطوة.. تلك الثوابت يعلمها اي اداري في موقع المسئولية.. وللأسف كل ما ذكرناه لا يوجد في (نينو)..!!
# *همسة:* أيها (العاطل) الإيطالي جيوفاني.. عليك الله.. قوم ارقص (تااااني).. لان الظاهر الرقصة اللي فاتت قبل شوية الناس ديل ما استمتعوا بيها..!!
